Премьер-министр Энергетика министрлігі мен «ҚазМұнайГазды» сынға алды

Ішкі нарықты жанармаймен қамтамасыз ету жөніндегі кеңесте премьер-министр дизель тапшылығына әсер еткен себептерді атап, Энергетика министрлігі мен «ҚазМұнайГаз» компаниясының жұмысын сынға алды. Оның айтуынша жағдайды ешбір мекеме бақылауда ұстамаған.

Үкімет басшысы аталған мекемелер логистика, мұнай өңдеу зауытынан өнім жөнелту және облыстарға қажет мұнай өнімінің мөлшерін белгілеу ісін үйлестіре алмай отырғанын айтты. Мұнай өңдейтін зауыттарға уақытылы цистерна жеткізе алмаған «Қазақстан теміржолын» да атап өтті. Дизель тапшылығына осы факторлар әсер етіпті.

Смайылов жанар-жағармай экспортына тыйым салынса да, отын түрлі жолмен шетел асып жатқанын жеткізді.

— Тыйым салынғанына қарамастан, бензин мен дизель басқа тауар ретінде шетелге кетіп отырған. Мысалы, пешке арналған отын экспорты 11 есе өсіпті. Бұл Энергетика министрлігінің бақылау жүргізбегенін білдіреді, — деді премьер-министр.

Шенеунік отынды мұнай өңдеу зауытынан облыстардағы мұнай базасы мен жанармай құю бекетіне жеткізетін оңтайлы жол табуды тапсырды. Сондай-ақ егін егетін және жинайтын кезде пойызбен жанармай тасымалдау тарифін төмендетуді және мұнай базалары мен жанармай бекеттерін бақылайтын комиссия құруды ұсынды.