Қазақстанда 2026 жылы автоөндіріс көлемі 34.2 % өсті

2026 жылы қыркүйекте Қазақстандағы автоқұрастыру кәсіпорындары 20 215 техника шығарды. Қазақстан автомобиль одағы бұл былтыр қыркүйектегі көрсеткіштен — 55.2 %, биыл тамыздағыдан 32.4 % көп екенін хабарлады.

Автоөндіріс қыркүйекте ғана емес, тоғыз айдың қорытындысы бойынша да өсім көрсетіп отыр. Жыл басынан бері елде жалпы 146 541 техника жасалған. Бұл 2025 жылғы үш тоқсанмен салыстырғанда 34.2 % жоғары көрсеткіш.

Бұған 2025 жылдың аяғында елде екі жаңа зауыт — Қостанайдағы Kia Qazaqstan мен Алматыдағы Astana Motors Manufacturing Kazakhstan-ның ашылғаны әсер еткені анық. Оның үстіне Қазақстанда локализация жалғасып жатыр. Мысалы, жақында Алматыда Omoda және Jaecoo кроссоверлерін құрастыру басталды, ал Қостанайда Li Auto өнімдерін шығаруға дайындық жүріп жатыр. Өскемендегі бос тұрған «Азия Авто» зауытын қытайлар алады деген ақпарат бар.

Өндіріс статистикасы жайлы айтсақ, Allur әлі көш бастап тұр. Зауыт жыл басынан бері Chevrolet, Škoda сияқты брендтердің 56 130 техникасын құрастырды. Екінші орынға Алматыдағы AMMKZ жайғасты. Кәсіпорын Қытай маркаларының 40 245 жеңіл автомобилін шығарды. Бұл зауытта Changan, Jaecoo, Omoda, Haval, Tank және Chery өнімдері жасалады. Үздік үштікті Алматыдағы Hyundai Trans Kazakhstan түйіндеп тұр. Ол 27 305 автомобиль құрастырған.

Рейтинг одан әрі былай жалғасады: Kia Qazaqstan (13 782), «СемАЗ» (2 293), QazTehna (2 014), Hyundai Trans Auto (998), «КАМАЗ-Инжиниринг» (804), Orbis Machinery (433), Daewoo Bus Kazakhstan (379) және «Уральскагрореммаш» (158).

Брендтер арасында Chevrolet алда келеді, тоғыз айда марканың 29 555 автомобилі жарық көрген. Бестікке Hyundai (27 275 дана), Kia (17 712), Changan (15 148) және Chery (12 593) енді.

Отандық автоөнеркәсіптің ең танымал моделі — Chevrolet Cobalt (27 659). Оның өндіріс көлемі үздік бестіктегі өзге төрт модельдің жалпы көрсеткішімен шамалас, олар: Hyundai Tucson (10 522), Kia Sportage (7 139), Hyundai Mufasa (6 743) және Changan CS35 Max (5 296).