Өзбекстан UzAuto Motors-ты сатады

Өзбекстан автоөнеркәсібін өзгеріс күтіп тұр. Жергілікті басылымдар Мемлекеттік активтерді басқару агенттігі басшыларына сілтеме жасап хабарлағандай, билік елдегі үлесі 80 пайыздан асатын негізгі автоөндірушіден бас тартуға дайындалып жатыр.

UzAuto жеке қолға өтетіні былтыр күзде президент Шавкат Мирзиёев АҚШ-қа барғанда белгілі болды.

UzAuto Motors және UzAuto Motors Powertrain зауыттарының жаңа иесі кім болатыны әзірге белгісіз. «Автострада» басылымы өндіріс орындары SAIC-GM-Wuling бірлескен кәсіпорнына өтуі ықтимал деді.

2027 жылы Өзбекстандағы кәсіпорындардың Chevrolet көліктерін өндіруге, технологияларын қолдануға және ТМД аумағында техникасын сатуға рұқсат беретін лицензиясының мерзімі аяқталады деген ақпарат бұған дәлел. Яғни болашақ иесі General Motors-пен қайта келісуі керек. Бірлескен кәсіпорынның америкалық концернмен тікелей байланысы бар.

Екінші дәлел — UzAuto Motors-тың қазіргі топтамасы. Кейінгі жылдары негізінен Қытай өнімдерінен тұрады. Мысалы, Onix, Tracker, Captiva және Equinox. Ал жаңа Damas вэні — Wuling Hongguang-тың өзгерген нұсқасы.

UzAuto Motors және UzAuto Motors Powertrain компанияларын сату бойынша тендер қашан өтетіні белгісіз.