16 тамызда өткен үкімет отырысында Әлихан Смайылов елдегі дизель отынының жағдайына қатысты бірқатар тапсырма берді.
Шенеунік Энергетика министрлігіне елде жанармай тапшылығын болдырмау үшін дер кезінде шара қабылдап, жанармай құятын бекеттермен тиісті жұмыс жүргізуді тапсырды. Смайылов 20 тамыздан бастап дизель сатқанда дифференциал (сараланған) баға қолдануды талап етті.
Үкімет басшысы «дер кезінде» тапшылықтың алдын алыңдар деп тапсырма бергенімен, олардың кешігіп қалғаны анық, өйткені бірқатар облыста, тіпті Алматының өзінде дизель жетпей жатыр.
Бұйрық жобасын энергетика министрлігі әзірлеп, қоғамдық талқылауға шығарды. Құжат бойынша ҚР азаматы тәулігіне жеңіл машинаға 100 литр, жүк көлігіне 300 литр дизельді 230-260 теңгеден (облысқа байланысты) құя алады. Осы шектен асса және өзге ел азаматтары дизельдің әр литрін 450 теңгеден сатып алады. Жанармай құю бекетінде жүргізушінің жеке куәлігі мен техникалық паспортын тексеруі мүмкін.
Жиында энергетика министрі Болат Ақшолақов та сөз сөйледі. Оның айтуынша қазір отандық мұнай өңдеу зауыттарындағы жоспарлы жөндеу жұмыстарын кейінге шегеру және өндіріс көлемін арттыру мүмкіндігі қаралып жатыр.
Комментариев: 0