Porsche сауда жоспарын өзгертеді

Қаңтарда бас директордың креслосын босатқан Оливер Блюмнің орнына Porsche тізгінін ұстаған Михаэль Ляйтерс табысы азайған компанияны қайта құру процесін бастап кетті. Уақыт жоғалтуға болмайды: I тоқсанда марка саудасы Еуропада — 11.8 %, Солтүстік Америкада — 11 %, Қытайда 21 % құлдырады.

Ляйтерс жолдан қосылған адам емес, 2000-2013 жылдары Cayenne мен Macan жобасына қатысып, суперкар әзірлеуге де атсалысқан білікті инженер. Ол енді шығынды барынша азайтып, брендті қиындықтан алып шығатын кризис-менеджер қызметін атқаруға мәжбүр.

Былтыр Porsche бүкәл әлем бойынша 280 мыңға жуық машина сатса, жаңа басшы 200 мың көлік өткізудің өзін жетістік деп санайды, ол 4-5 жылда операциялық табысты 10–15 % арттыруға ниетті деп жазды Handelsblatt. 350-400 модельдің кілтін тапсырсақ деген бұрынғы жоспарды жүзеге асыру әзірше мүмкін емес.

Негізгі бизнеске көп көңіл бөлу үшін Porsche үш үлестес компаниясы: батарея дайындайтын Cellforce Group, велосипедтің электр жетегін әзірлейтін Porsche eBike Performance және арнайы бағдарламалық жасақтама әзірлейтін Cetitec-ті жабады.

Қазір бренд басшылары қызметкер санын қысқарту үшін кәсіподақпен келіссөз жүргізіп жатыр. Ең алдымен Вайсахтағы ғылыми-зерттеу орталығындағы мамандар жұмыссыз қалатын сияқты. Біраз уақыт бұрын Car-IT бөлімін тарататыны, кеңес құрамына кіретін директорлардың біразы қызметінен кететіні белгілі болған.