АҚШ Канададан келетін автомобильге екі есе көп салық салады

АҚШ, Канада және Мексика арасындағы USMCA сауда келісімінің мерзімін ұзарту жөніндегі келіссөз сәтсіз аяқталды. Нәтижесінде АҚШ Канададан келетін ірімшік, сыра, цемент және хоккей жабдықтарына 50 % баж салығын енгізді. Артынша Дональд Трамп өзінің Truth Social әлеуметтік желісінде 2027 жылы 1 қаңтардан бастап Канададан келетін барлық жеңіл автомобиль мен жүк көлігіне, автокомпонент пен болатқа салынатын кедендік алым да 50 %-ға дейін өсетінін хабарлады.

АҚШ қазіргі 25 % тарифті екі есе көтерумен қатар Оттаваны сынға алды. Ақ үй қожайыны Канаданы «АҚШ-ты жылдар бойы тонады» деп айыптады. Трамп автоөндірушілер үшін жаңа тарифтен құтылудың жалғыз жолы — зауытын АҚШ аумағына көшіру екенін ашық айтты.

Бұған жауап ретінде Канада премьер-министрі Марк Карни елдегі жұмысшылар мен кәсіпорындарды қорғау үшін Оттава АҚШ-тың өзіне дәл сондай тариф енгізетінін мәлімдеді деп хабарлады Euronews.

Бұл жағдайға Мексика алаңдап отыр. Мехико Трамп Канададан кейін оңтүстіктегі көршісіне де осындай ультиматум қойып, Қытай автоөнеркәсібімен байланысты үзуге мәжбүрлей ме деп қауіптенеді.