ҚР ІІМ берген мәлімет бойынша 19 қыркүйек күні елде адам өліміне әкелген бірнеше жол апаты болды:
- Қарағанды облысында МАЗ жүк көлігі мен ПАЗ автобусы соғылып, салдарынан төрт адам көз жұмды.
- Қостанай облысында Қостанай — Әулиекөл — Сұрған тас жолында екі машина бетпе-бет соғылды. Апаттан бір кісі қайтыс болды, үш адам ауруханаға түсті.
- Ақтөбе облысындағы Кеңсахара ауылына жақын жерде РФ азаматы жол шетімен келе жатқан 32 жастағы жаяу жүргіншіні қағып кеткен. Ер адамды аман алып қалу мүмкін болмады.
- Жетісу облысында жер үйдің ауласында жөндеуде тұрған DAF жүк көлігі абайсызда екі жасар қызды басып кеткен.
- Сол облысқа қарасты Батыс Қытай — Батыс Еуропа тас жолында жол талғамайтын көлік аударылып, үш адам ажал құшты.
- Астанаға жақын орналасқан Астана — Петропавл тас жолында ВМW алдында келе жатқан «Газельге» соғылып, седан жүргізушісі оқиға орнында мерт болды.
Тәртіп сақшылары жол қозғалысына қатысушыларды ереже сақтауға шақырады, ал ең бастысы — бейқамдықтың салдары өте ауыр болатынын естен шығармаған жөн.
ІІМ өкілдері жолда кез келген адам өзінің де, өзгенің де өміріне жауапты екенін ұмытпауға тиіс деп атап өтті. Белгісі жоқ жерден жүгіріп өтем деп жазым болуыңыз мүмкін. Ата-аналардан балаларды көзден таса қылмауды, мектепке шығарып салып, уақытында күтіп алуды сұраймыз. Жылдамдық режимін, көлік арасындағы қауіпсіз қашықтықты сақтаудың маңызы зор. Бұл жолда жағдай күрт өзгергенде апаттан аман қалуға көмектеседі.
Комментариев: 0