Nissan күтпеген жерден көмек алды

Reuters хабарлағандай, Nissan-ның ең ірі акционері — Renault жапон брендінің бәсекеге қабілеттілігін қалпына келтіру бағдарламасы аясында үлесін 15-тен 10 %-ға дейін азайту туралы шешім қабылдады.

Агенттіктің мәліметінше жапониялық автоөндіруші Renault-ның Ampere электромобиль бөлімшесіне 600 миллион еуро инвестиция құю міндетінен босатылады.

Renault Үндістандағы Nissan-мен бірлескен бизнесінің бақылау пакетін сатқанда компанияның қаржылық жағдайы жақсарады. Мәміле 2025 жылдың ортасына дейін аяқталуы керек. Француздар Тамилнад штатындағы жылына 400 мың автомобиль шығаратын зауыттың өндірістік қуатын толығымен пайдалануға күш салса, Nissan көлік сатып, қызмет көрсетумен айналысады.

Renault бас директоры Лука де Мео Renault Group альянстағы негізгі акционер ретінде серіктес компанияның қаржылық көрсеткішін жақсартуға мүдделі деп мәлімдеді.

Honda-мен келісе алмаған Nissan үшін бұл жақсы мүмкіндік әрі күн шығыс еліндегі үшінші ірі автоөндірушінің жағдайы жақсарар деген үміт береді.