Метро желісі Алматы-1 вокзалына дейін созылады

Бүгін Қоғамдық кеңес отырысында мегаполис әкімі Ерболат Досаев 2030 жылға дейін қалада көлікке ауысып отыратын төрт хаб құрылатынын хабарлады, олар қалаға кіреберістегі жүктемені азайтуға тиіс.

Шаһар басшысының сөзіне сенсек қоғамдық көлікті дамыту мақсатында Қалқаман мен «Алтын Ордаға» дейінгі батыс бағытта үш метробекет салынады. Болашақта Алматы-1 теміржол вокзалына дейін баратын жаңа желі салу жоспарда бар. Оның құрылысы қашан басталатынын әкім ашып айтпады, дегенмен Түрксіб ауданының тұрғындарымен кездескенде солтүстік желі қазіргі теміржолды бойлай, жер үстімен өтіп, Сүйінбай даңғылына дейін созылуы мүмкін деген.

Сонымен қатар Досаев 2025 жылға дейін тоғыз көшені ұзарту жұмысы толық аяқталып, «Қалқаман» бекеті ашылатынын айтты.

Шенділер 2025 және 2030 жылға дейін Алматы қаласын дамыту жоспары биыл 5 қыркүйекке таман қабылданады деп сөз берді.