Жоба Алматы қаласын дамыту орталығының сайтында жарияланды. Оны алда мегаполис тұрғындары талқылайды. Даму жоспары қала өмірінің барлық саласына арналған, ол көлік саласын да қамтиды.
Жоспарға сай алдағы үш жылда тоғыз көшені ұзарту жұмысы мен метро желісінің құрылысы жалғасады. Сондай-ақ 40 км қоғамдық көлік жолағы сызылады (қай көшелерде екені белгісіз. Бірақ картадан қазіргі BRT желісін «Шығыс қақпаға» дейін ұзарту жоспарланғаны байқалады).
Алматы 2030 жылға дейін жүрдек трамвай (LRT) және бірнеше электробус қуаттау бекетін іске қосады.
Қалаға кіріп-шығуға қолайлы болу үшін 2025 жылға дейін Құлжа тас жолы мен Шамалғанға дейінгі жол, ал 2030 жылға дейін жоғарғы Қаскелең тас жолы мен Талғар тас жолы кеңейтіледі.
Боралдайда Алматы 3 темір жол вокзалы салынады, Алматы 2 бекетінен Қонаевқа (бұрынғы Қапшағай қаласы) электр пойызы қатынайды. Бірақ жаңа жобаға бұрынғы әкім Сағынтаевтың Талғар мен Қаскелеңге электр пойызы қатынайды деген жоспары енбепті.
Қала билігі 2030 жылға қарай автотұрақ бағасын өзгертуді жоспарлап отыр. Басты мақсат — қалада жеке көлікпен жүруді тиімсіз ету.
Шенділер бұл қаланы дамыту жоспарының жобасы екенін айтады. Ол қала тұрғындарының қалауына қарай өзгеруі мүмкін.
Комментариев: 0