SkyTrain Қаскелең мен Талғарға қатынайды

Алматының Бас жоспарына өзгеріс енгізу туралы Үкімет қаулысы 29 қыркүйекте жарияланып, сол күні күшіне енді. Құжатта қаладағы көше-жол желісі мен көлік жүйесін дамыту 2030 және 2040 жылға дейін екі кезеңге бөлінеді деп жазылған.

Халық саны 2.29-дан 3.6 млн адамға дейін өседі деген болжам, қала аумағының кеңеюі және жолаушы таситын қоғамдық көлік жүйесін дамыту арқылы тұрғындардың жеке автомобильге тәуелдігін азайту жобаға негіз болды.

Рельсті жүрдек көлік

Жүйе жылдам қатынайтын көлік желісінен тұруға тиіс. Екінші және үшінші желілер салынғанда метро 2030 жылға таман 13.4-тен 35 км-ге, 2040 жылы 123.6 шақырымға ұзарады.

Алдағы жылдары қалада жеңіл рельсті көлік іске қосылады. 31 км болатын алғашқы LRT батыс аудандарды Алматы-2 вокзалымен және «Батыс» пен «Шығыс» тораптарымен байланыстырады. 2040 жылы желінің ұзындығы 79 шақырымға жетеді.

Былтыр алғаш ашылған BRT желісіне Райымбек даңғылындағы екінші желі қосылады. Жоба бойынша билік 42 шақырымдық монорельсті SkyTrain жүйесіне арналған дәлізді сақтап қояды. Болашақта ол Қаскелең мен Талғарға дейін созылуы мүмкін. Арқанжол салынады және аэротаксиге арналған вертипорт желісі арқылы әуедегі мобильділікке негіз болады.

Жерүсті қоғамдық көлік

Бас жоспарға сәйкес бағыт пен оның инфрақұрылымы өзгереді. 27 соңғы аялдама кешені, 15 кері бұрылу алаңы және жалпы қалалық 12 көлік торабы салынады. Троллейбус желісі 240 км деңгейінде қалады, 2026–2027 жылдары байланыс және кабель желілері толық жаңарады. Парк 300 машинаға дейін ұлғаяды. Негізгі магистральдарда қоғамдық көлікке арналған арнайы жолақтар көбейеді.

Көше-жол желісі

Бірінші кезеңдегі негізгі шешімдер — жалпы қалалық маңызы бар магистральдарды (Абай, Рысқұлов, Төле би) батысқа, яғни ҮААЖ-ға дейін ұзарту және Саин көшесін солтүстікке қарай, Райымбек даңғылын Шығыс айналма жолға дейін ұзарту, Мөңке би мен Б. Хмельницкий көшелерін жалғастыру. 2030 жылға дейін барлығы 44.3 км жаңа жол бөліктері, ал 2040 жылға дейін тағы 50.5 км жол салынады. Магистральді желінің тығыздығы 1.7-ден 1.84 шаршы кмилометрге дейін артады. Машина ең көп жиналатын теміржол өткелдері әр деңгейлі қиылыстарға ауысады.

Сыртқы көлік байланысы

Қаланың көлік құрылымы екі айналма жолға негізделеді: сыртқы (ҮААЖ) және ішкі (Рысқұлов, Шығыс айналма жолы, Әл-Фараби, Саин). Транзиттік және жүк көліктері қала сыртына шығып, логистикалық кешендер ҮААЖ маңына жайғасады. Теміржол үшін Жетіген — Қазыбек бек айналма жолы бар. Автомобильді қалдырып, қоғамдық көлікке ауысуға болатын жолаушы терминалы көбейеді.

«Батыс», «Солтүстік» және «Шығыс» автовокзал кешендері метро, LRT және BRT желілерімен бірігіп, торапқа айналады. Әуежай мен қаланы жылдам жүретін қоғамдық көлік жалғайды.

Жаяу жүргінші және велосипед инфрақұрылымы

Веложолдар 2030 жылға қарай 96-дан 262.8 км-ге дейін ұзарады. Көлік торабында велосипед тұрағы мен жалға беру нүктелері болады. Тұрғын және қоғамдық аймақтарда көлік легінен оқшау жаяу жүргіншілер жолы салынады. Олардың нақты орналасатын жерін жоба әзірленгенде білеміз. 2040 жылға қарай қоғамдық көлік желісінің жалпы ұзындығы 981-ден 1214 км-ге дейін созылады. Негізгі жүктеме қала орталығын, шеткі аудандарды және спутник қалаларды байланыстыратын жүрдек көлік түрлеріне түседі.

Бас жоспардың жаңа нұсқасында көлік инфрақұрылымын дамыту схемасы толық емес. Бұған дейінгісі бірнеше рет құбылған. Қазіргісі қанша уақыт өзгермей тұратынын көре жатармыз.