Mercedes-AMG концептісі қуаттау бойынша рекорд орнатты

Mercedes-AMG GT XX төзімділік сынағында бірқатар рекорд орнатқаннан кейін тағы бір жетістікке қол жеткізді. Mercedes-Benz арнайы жасалған станцияның прототипі арқылы электрокар батареясын бір мегаваттан асатын токпен толтырды. Компания мұндай станцияларды 2026 жылдан бастап шығарып, концептідегі аккумуляторды сериялы модельдерге бейімдейді.

Сынақ кезінде ең жоғары қуаттау тогы 1041 кВт болды. Жүйе қосылғаннан кейін 1000 кВт межеге небәрі жарты секундта жетіп, бұл көрсеткішті 2.5 минут бойы ұстап тұрды. Инженерлердің есебінше станция бір минут ішінде 17.3 кВт⋅сағ энергия берген, ол WLTP циклі бойынша 125 километрге жететін жүріс қорына тең.

Mercedes-Benz қуаттау станциясын Alpitronic компаниясымен бірлесіп әзірледі. Ол жақсарған термореттеу жүйесімен және сұйықтықпен салқындайтын CCS кабелімен ерекшеленеді.

Компания сериялы көліктеріне орнататын инновациялық батареяда құрылымы басқаша ұяшықтар бар. Олар арқылы ток өткізбейтін салқындатқыш май өтеді. Мұндай аккумулятор жылдам қуат алады және энергия сақтау тығыздығы рекордтық деңгейде болады.

1000 киловаттық станция 2026 жылы Mercedes-Benz-тің Еуропа мен Солтүстік Америкадағы хабтарында салына бастайды. Онжылдықтың аяғына дейін әлем бойынша шамамен 10 мың бекет пайда болады, әрі оны басқа марка электромобильдері де пайдаланады.

Бұған дейін BYD мегаваттық станциясын көрсеткен еді. Mercedes-Benz бекеті мен электромобилі әзірге концепт болса, Қытай бренді алғашқы Megawatt Flash Charger құрылғыларын қолданысқа енгізіп үлгерді.