Mercedes-AMG жоғары технологияға ие AMG GT XX концептісі Италиядағы «Нардо» трегінде рекорд орнатты деп мәлімдеді. Прототип трассада 7 күн 13 сағат 23 минут 7.10 секунд бойы үздіксіз 300 км/сағ жылдамдықпен қозғалған. Нәтижесінде электрокар 25 түрлі рекорд жаңартып, Жер шарын экватор бойымен айналып өткенмен тең жол жүрді.
Mercedes-AMG өкілдері аптаға созылатын марафонның мақсаты рекорд орнату емес, AMG GT XX концептісінің төзімділігін сынау деді. Өйткені ұзаққа созылған жоғары жылдамдық пен қайта-қайта қуаттау электроникаға ауыр салмақ түсіреді. Прототип бір аптадан аса уақытта 850 киловатт станцияға ғана тоқтап, қалған уақытта 300 км/сағ жылдамдықпен жүрді.
Компания концептінің 24 сағатта жүріп өткен жолын тағы бір маңызды рекорд ретінде тіркеді. Көрсеткіш 5479 км болды, бұл бұрынғы рекордтан 1518 км көп. Бірақ ол рекордты сынақ прототипі емес, сериялық автомобиль — Қытайдың Xpeng P7 электролифтбэгі тіркеген.
AMG электрокарының тағы бір маңызды нәтижесі — жүріп өткен жалпы қашықтығы. Бұл көрсеткіш 40 075 км болды, яғни бір апта 13 сағатта концепт Жер шарын айналып өткенмен бірдей жол жүрді. AMG XX GT «Нардо» трегін 3177 мәрте айналды.
Компания өзге рекордтарды екі категорияға бөлді. Біріншісі — электрокардың белгілі қашықтықты жүріп өткен уақыты, мысалы: 2000 километрді 8 сағат 40 минутта немесе 15 мың мильді 4 күн 11 сағат 52 минутта еңсерген. Екіншісі — концептінің белгілі бір уақытта жүре алатын қашықтығы. Мысалы, 48 сағатта 10 859 шақырымды артқа тастады.
Mercedes-AMG GT XX ең жаңа AMG.EA платформасына негізделген, машина жалпы қуаты 1360 ат күшіне жететін үш қозғалтқышпен жабдықталады. Бренд платформаны да, қозғалтқышты да көптеп өндіреді.
Комментариев: 0