Бүгін таңертең мемлекет басшысының төрағалығымен еліміздегі әлеуметтік-экономикалық жағдайға қатысты кеңес өтті. Ақорда сайтында хабарланғандай, президент мынадай тапсырма берді:
- Бензин, дизель, сұйытылған газ бағасын 180 күнге мемлекеттік реттеуді енгізу;
- Әлеуметтік маңызы бар азық-түлік тауарларының бағасы бойынша мемлекеттік реттеуді енгізу. Шешімді нақты аймақтағы әлеуметтік-экономикалық жағдайға қарай өңірлердің әкімдері қабылдайды;
- «Жеке тұлғалардың банкроттығы туралы» Заңды әзірлеу;
- Халық үшін 180 күнге коммуналдық тарифтерді көтеруге мораторий енгізу қажеттігін қарастыру;
- Халықтың әлеуметтік жағдайы нашар топтары үшін нарықтағы баспананы жалға алу құнын субсидиялау мәселесін қарастыру;
- Денсаулық сақтау және балалар мәселелерін шешу үшін «Қазақстан халқына» деп аталатын қоғамдық қор құру, оны мемлекеттік және жеке көздер арқылы қаржыландыру.
Бірқатар қалада наразы азаматтар шеруге шықты. Олар сұйытылған газдың қымбаттауына наразылық білдіріп, үкіметке экономикалық және саяси талаптар қойды. Алматы, Шымкент және Тараз қалаларында әкімдікке шабуыл жасалып, есік-терезе сынды және өзге де материалдық шығын келтірілді. Ішкі істер органдарының 95 қызметкері зардап шегіп, 37 қызметтік көлікке зақым келді.
Полиция елде 200 адамды ұстады. Алматы мен Маңғыстау облысында төтенше жағдай жарияланып, комменданттық сағат күшіне енді. Ел үкіметі отставкаға кетті. Премьер-министр қызметін уақытша Әлихан Смайылов атқарады.
Бірнеше жыл бұрын Қазақстанда жанармай бағасын реттеуге араласпау туралы шешім қабылданған. Былтыр қарашада президент жағармай бағасын мемлекеттік реттеуді қайтаруды ұсынды. Бірақ Энергетика министрлігі бағаны реттеу мүмкін емес екенін айтқан. Нәтижесінде елімізде дизель мен бензин бағасы тұрақты түрде өсіп жатыр. 2021 жылы автогаз да қымбаттап, литрінің құны 130 теңгеге жетті.
Комментариев: 0