Mazda Ресей автонарығынан кететінін мәлімдеді. «Мазда Соллерс» бірлескен кәсіпорнындағы жарты үлесін серіктесіне бір еуроға сатқан марка 82 млн доллар шығындалды.
Қиыр Шығыстағы Mazda және «Соллерс» зауыты 2012 жылы ашылған. Жылына 100 мың машина шығаруға қауқары жететін өндіріс орнында мамандар CX-5 және CX-9 кроссоверлерін, Mazda 6 седанын құрастырды.
Биыл көктемде компания Ресейге автомобиль экспорттамайтынын хабарлады. Зауыт жұмысы да сол кезде тоқтаған. Мұндай шешім қабылдауға санкция салдарынан тауар тасымалдау қиындағаны себеп болды.
Мәміле шарты бойынша Mazda үш жыл ішінде өз активін қайта сатып алуға құқылы. Алайда «Соллерс» зауытта басқа модельдер жасалатынын мәлімдеді. Бұл жөнінде алғаш қыркүйекте белгілі болған, сол кезде компания өкілдері жаңа серіктестерімен келісім жүргізіп жатқанын айтты. 2023 жылы зауыт қайта жұмыс бастауы мүмкін.
Біраз уақыт бұрын «Соллерс» коммерциялық Ford Transit шығаратын Елабугадағы зауытты меншігіне алды, ал «Форд» ел нарығынан кетті. Алдын ала мәлімет бойынша онда енді JAC көліктері жасалады.
Жапон өндірушілеріне келер болсақ, Nissan мен Toyota да Ресейдегі зауыттарын жабатынын және бұдан 100 миллиард иен (660-680 млн доллар) шығын келгенін хабарлады.
Комментариев: 0