Оңтүстік Кореяның кеден қызметі Ресей мен Беларуське заңсыз автомобиль жіберген сатушылар тобын әшкереледі. Оларға жергілікті кеден, сыртқы сауда және валюта заңнамасын бұзды деген айып тағылып отыр.
Жергілікті Chosun басылымы хабарлағандай, төрт күдікті 2024 жылғы наурыз бен 2025 жылғы желтоқсан аралығында Ресей мен Беларуське кемі 1024 ескі автомобиль жөнелтіпті. Олардың жалпы құны 50.7 млрд вон (17 млрд теңге) болған. Санкцияға байланысты Ресейге қозғалтқыш көлемі екі литрден асатын машинаны экспорттауға болмайды.
Заңсыз схеманы ұйымдастырушылар кеден және экспорт құжаттарын қолдан жасап, автомобильдер Ресей арқылы көрші елдерге барады деп көрсеткен. Жалған құжатта нақты қай мемлекет аталғаны белгісіз, бірақ арасында Қазақстан болуы әбден мүмкін. Жеткізушілер тапсырысты әлеуметтік желі арқылы қабылдап, төлемді криптовалюта түрінде алған.
Комментариев: 0