Биыл қытайлық ауыр коммерциялық техника өндірушілерге Ресейдің реттеуші органдары қысым көрсете бастады. Алдымен Shacman, кейін DongFeng, Foton, FAW және Sitrak сияқты бірқатар марканың тынысы тарылды. Олардың модельдік топтамасы толықтай Көлік құралының типін мақұлдау құжатынан айырылды.
Мұндай қатаң шара қабылдауға машиналардың техникалық регламент талабына сай келмеуі себеп болған. Атап айтқанда, шу деңгейі, тежеуіш жүйесі, шұғыл көмек шақыру құрылғысы регламентке сәйкес келмепті. Компоненттерін де дұрыс таңбаламаған көрінеді.
Бірнеше айдан кейін Росстандарт талапты жеңілдетіп, Sitrak және Howo жүк көліктерін (дөңгелек формуласы 6×2, 6×4 және 8×4 ) қамтыған шектеуді алып тастады. Сондай-ақ «Авторевю» осы брендтердің екі осьті модельдері еш кедергісіз сатылып жатыр деп жазды. Басылым реттеуші органдар Қытай жүк көліктерінің бір бөлігін нарықтан уақытша шығарып тастауды мақсат етті деп болжап отыр.
Ең қызығы, Sitrak пен Howo құрамына кіретін Sinotruk концерніне қатысты шағым Ресей президенті Владимир Путин Бейжіңге барған соң сап тыйылды. Бұл жай сәйкестік пе, әлде жоғары деңгейлі келіссөз болды ма, белгісіз.
Саудасы тоқтаған өзге модельдер Ресейге қашан оралатыны қазірше белгісіз. Росстандарт автоөндірушілермен алдағы жұмыстарды талқылап жатыр.
Комментариев: 0