2025 жылдың басында мемлекет жанар-жағармай бағасын реттеуден бас тартқаннан кейін бензин мен дизель құны шенеуніктер болжағандай бірден шарықтамаса да, біртіндеп қымбаттап келеді. Болашақта елімізде жанармай бағасы көршілес елдермен, соның ішінде Ресейдегідей болады деген болжам бар.
Сәуірдің аяғындағы танымал жанармай құю станцияларындағы бағамен салыстырсақ, мамырдың аяғына қарай жанармай 2-ден 5 теңгеге өскен. Сұйық отын құны бірден өзгермеді. Алдымен мамырдың ортасында сәл көтерілді, кейін айдың аяғында тағы жоғарылады.
Қазір Алматыдағы ірі станциялар АИ-92 маркалы бензинді 209-212 теңгеге сатып жатыр. Ең арзан бензин Royal Petrol-да, ал ең қымбатын Qazaq Oil-дан табасыз. Sinooil, Helios және «Газпромнефть» сияқты жанармай бекеттерінде литрі 210 теңге тұрады.
Дизельдің құны айтарлықтай өзгерді. Алматыда 3-6 теңгеге қымбаттады. Мысалы, Royal Petrol-да баға 307-ден 309 теңгеге, Helios пен Sinooil-да 305-тен 309 теңгеге, Qazaq Oil-да 307-ден 311 теңгеге, «Газпромнефть» станцияларында 307-ден 310 теңгеге қымбаттады.
Алматыда АИ-95 сол қалыпта (271–275 теңге) тұр. Мамырда тек Royal Petrol-да 270 теңгеден 275 теңгеге өсті.
Республикалық маңызы бар басқа қалалар да тыс қалмады. АИ-92 Астанада 209–213 теңге (сәуірде 208–209 теңге болған) тұрады. Жазғы дизель сәуірде 303–305 теңге болса, қазір 307–311 теңгеден саудаланады.
Шымкентте жанармай бағасы әлі де айтарлықтай арзан, дегенмен АИ-92 маркалы бензиннің құны 200 теңгеден асып кетті. Қазір 200–201 теңге шамасында. Helios пен Sinooil дизельді 300 теңгеге беріп жатыр. АИ-95 Helios-та 250 теңгеден 255 теңгеге көтерілді.
Комментариев: 0