Сейсенбі, 28 қаңтарда Қасым-Жомарт Тоқаевтың төрағалығымен өткен үкімет отырысында жанар-жағармай бағасын мемлекет тарапынан реттеуден бас тарту жоспары қайта қозғалды.
Премьер-министр Олжас Бектенов газ бағасын кезең-кезеңмен еркін айналымға жіберу басталды деді. Ол нарықтағы бағаны қалыптастыруға біртіндеп көшу инвестиция тартуға, жанар-жағармай тапшылығынан арылуға сеп болатынын және үкімет бағаның күрт өсуіне жол бермейтінін атап өтті.
Отырыста мемлекет басшысы да пікір білдіріп, ТМД елдерінің көбінде мұнай өнімдерінің құны Қазақстанға қарағанда жоғары екенін және сұйық отынды көрші елдерге заңсыз таситындар барын айтты.
Энергетика министрлігі 2022 жылдан бері елде жанар-жағармай өндіру және үлестіру жүйесін реформалау шаралары жүріп жатқанын еске салды. Оған сұйық отынды Қазақстан мен ЕЭО шекарасынан тыс жерге шығаруға тыйым салудан бастап, отандық жүргізушілер мен шетелдіктер үшін дифференциал баға енгізу, сұр экспортты бақылауды күшейту секілді шаралар кіреді.
Қазір Қазақстан мен көрші елдер арасындағы баға айырмашылығы 140 %-ға жетті. Тыйым салу шаралары заңсыз экспортты тоқтатуда тиімсіз екенін көрсетіп отырғандықтан, еркін айналымға жіберу қажеттігі туындады. Шенеуніктер бұл бүгінгі мәселелерді шешіп қана қоймай, жұмыс істеп тұрған мұнай өңдеу зауыттарын кеңейтуге және жанар-жағармай өндірісін арттыруға инвестиция тарту үшін болашақтағы проблемаларды шешуге де көмектесуі керек деп санайды.
Бензин мен дизель бағасын мемлекеттік реттеуді доғару және автогаздың шекті бағасын көтеру туралы бұйрық жобасы 17 қаңтарда «Ашық НҚА» порталында жарияланды.
Комментариев: 0