Көлік салығының өсімақысы қалай есептеледі

Ел тұрғындары 2025 жылғы салықты биыл 1 сәуірге дейін төлеуге тиіс болатын. Себебі осы айдың 2-сінен бастап күн сайын өсімақы қосылады. 10 мамырға дейін қазынаға мүлде қаражат түспесе, құзырлы орган шара қолданады. Іс сот орындаушысына өтсе, ол борышкердің елден шығуына тыйым салуы мүмкін.

Өсімақы деген не

Өсімақы — міндетті төлемді дер кезінде бермеген борышкер бюджетке құятын айыпақы түрі. Салық кодексіне сәйкес белгіленген уақыттан кешіккен сәттен бастап күнде Ұлттық банк бекіткен соманың 1.25 еселік мөлшері түрінде өсімақы қосылып отырады.

Өсімақы қалай есептеледі

Мемлекеттік кірістер комитетінің арнайы бөлімінде есептеу тәсілі бар. Бірақ оны Ө=(Б*Қ*k*К)/365 формуласы бойынша өзіңіз анықтай аласыз. Мұндағы Ө — есептелген өсімпұл; Б — берешек сомасы; Қ — қайта қаржыландыру мөлшерлемесі; k — еселік коэффициенті; К — күн саны.

Мысал ретінде көлік иесі мемлекетке 10 мың теңге қарыз делік. 2025 жылы базалық мөлшерлеме 16.5 % болды. Азамат заңға сай салықты сәуірдің 1-і емес, 7-сінде төлеймін деп шешті.

Формула көмегімен есеп шығарамыз:

10 000×16.5 % х 1.25×6 = 33.9 теңге, яғни кешіккен әр күн үшін 5.65 теңге.

Бұл көп емес сияқты көрінгенмен, қозғалтқыш көлемі 1100 текше см-ден аспайтын көлік мінгендер үшін маңызды. Олар 1 АЕК салық төлейді. Бірақ соның өзі салық бұйрығы шығып, істің сот орындаушысының қолына өтуіне ықпал етеді. Себебі 1 АЕК шекті сома, одан аз қарызы бар адамға салықшылар үндемеуі мүмкін, ал өсімақы қосылған кезде төлем мөлшері сол шектен асып кетеді де, ұмытшақ кісі комитеттің нысанасына ілінеді.