Kolesa.kz-те көне Ford Model T сатылады

Kolesa.kz порталынан күнде көріп жүрген қарапайым көлікті де, сирек кездесетін модельдерді де табуға болады. Аракідік айрықша машиналар кездеседі. Соның бірі — 1915 жылғы Ford Model T. Биыл екі орынды кабриолеттің шыққанына 110 жыл толды.

Ford Model T әлемде сирек кездеседі дей алмаймыз. Ол жалпы халыққа арналған модель. 1909–1927 жылдары 14 689 525 Model T шыққан. 1915 жылы 308 162 данасы жарық көріпті.

1 / 14

• 
• 
• 
• 
• 
• 
• 
• 
• 
• 
• 
• 
• 
• 

1 / 14

Осы күнге дейін нешеуі сақталғаны белгісіз. Бірақ біз сөз етіп отырған экземпляр Қазақстандағы жалғыз Model T болуы әбден мүмкін.

Автомобиль Алматыда тұр, қазір шеберлер жөндеп жатыр. Сатушы шанағын тот баспағанын әрі оны зауыттан шыққандағы қара түске қайта бояғанын жазыпты. Модель 2 сатылы беріліс қорабымен жұмыс істейтін 20 ат күшіне ие 2.9 литрлік мотормен жүреді. Шассиі де жөндеуден өткен.

1 / 6

• 
• 
• 
• 
• 
• 

1 / 6

Техниканы қалпына келтіру жұмысын жаңа иесі өзі аяқтауы керек. Салонын және төбесін қайта тігу қажет. Сондай-ақ радиаторын, алдыңғы әйнегін және басқа бірқатар компонентін орнатуға тура келеді.

Иесі автомобильді Қазақстанда рәсімдеп, есепке қойғанын жазыпты. Оны 27 млн теңгеге сатуды жоспарлап отыр. Айта кетейік, 1915 жылы мұндай Model T-ді 390 долларға алуға болатын. Инфляцияны ескергенде бұл қазіргі бағамен 12.4 мың долларға (6.7 млн теңге) тең.