Kolesa.kz-те 80 жыл бұрын шыққан Harley-Davidson WL сатылады

Алматыда біздің елде сирек кездесетін ерекше мотоцикл саудаға шықты. Ол — 1946 жылғы Harley-Davidson WL. Яғни биыл бұл «Харлейдің» жарық көргеніне 80 жыл толып отыр. Соған қарамастан, ол әлі де жүреді әрі Қазақстанда тіркелген.

Қызыл қоңыр және қара түске боялған WL — әскери WLA моделінің азаматтық нұсқасы. Рамасы, багы және қаптамасы сол кезеңдегі өзге Harley-Davidson модельдеріне, нақтырақ айтқанда, Knucklehead деген атпен танымал EL-ге ұқсайды. Ал күштік құрылымы WL-дің өзінікі.

Байк көлемі 739 текше сантиметр болатын 25 ат күшін беретін V тәрізді екі цилиндрлі мотормен жүреді. Шынжыры оң жақта орналасқан.

1 / 7

• 
• 
• 
• 
• 
• 
• 

1 / 7

Басқару органының орналасуы да қазіргі мотоциклистерді таңғалдыруы мүмкін. Біріншіден, алдыңғы тежеуіш рөлдің сол жағында тұр, артқы тежеуіш әдеттегідей оң жақтағы педаль арқылы жұмыс істейді. Екіншіден, мотоциклде аяқпен басатын ілініс және қолмен жұмыс істейтін 3 сатылы беріліс қорабы бар. Екі механизм де сол жаққа жайғасқан.

Indian брендінің соғысқа дейінгі техникалары бұдан да ерекше болған. Бұл марканың мотоциклдерінде газ тұтқасы сол жақта тұрады.

WL аспасы хардтейл схемасы бойынша жасалған. Байктың артқы бөлігі рамаға қатты бекітілген, жолда жүргізуші қатты шайқалмау үшін орындықтың астына жеке аспа қойыпты. Алдында кастомайзерлер спрингер деп атайтын классикалық иінтіректі шанышқы тұр.

Ескі Harley-Davidson WL-ді иесі 6.5 млн теңгеге сатқысы келеді. Ол саудаласпайтынын айтты, бірақ раритет круизер, трицикл не әлемді шарлауға жарайтын көлікке айырбастауға дайын.