Kolesa.kz-те сирек кездесетін «Волга» ГАЗ-3111 сатылады

Kolesa.kz-те өте қызық седан сатылып жатыр. Ол 1998 жылы Мәскеу автосалонына қатысқан ГАЗ-3111, бірақ зауыт оны көптеп өндірмеді.

Машинаны әзірлеу процесі 1996 жылы басталып, өте қысқа мерзімде аяқталды. Соған қарамастан инженерлер сол кезеңдегі қауіпсіздік талаптарына сай келетін жаңа шанақ жасай алды. Оның үстіне «он бірінші» Ресей автоөнеркәсібі үшін жаңалық саналатын ABS сияқты технологиялармен ерекшеленді.

ГАЗ-3111 дизайны қайшылыққа толы. Авторлар седанды Горький автозауытының өнімі ГАЗ-21-ге ұқсатуды ойлаған, сондай-ақ жаңаша әрі эмоция сыйлайтындай болғанын қалапты. ГАЗ-дың бас дизайнер-стилисі Игорь Безродных айтқандай: «он біріншіде» 60 және 70 жылдардың рухы бар, ол айрықша әрі сәнді… одан 60 жастағы қарт та, 20 жастағы жігіт те өзіне ұнайтын ерекшелік таба алады.

Салонынан премиум мәртебесі байқалады, ГАЗ-3111 былғары қаптама, ағаш өрнектер, реттелетін рөл, электрлі әйнек көтергіш, электр көмегімен реттеуге болатын айна және тағы басқа заттармен жабдықталған.

Көліктің күштік құрылымы да назар аудартады. «Волганың» базалық қозғалтқышы — механика қораппен жұмыс істейтін, 155 ат күшіне ие 2.5 литрлік ЗМЗ-4052.10. Кей машина қуаты мен көлемі аздау ЗМЗ-4062.10 моторымен (2.3 литр, 136 а.к.) жүреді. Toyota-ның 2.7 және 3.4 литрлік бензинді және 2.5 литрлік дизельді агрегатымен жүретін автомобильдер де бар.

ГАЗ-3111 толыққанды сериялық өндіріске шыққан жоқ. 2000–2004 жылдары седанның 415–424 данасы Горький автозауытының конвейеріне тұрды деген ақпарат бар.

1 / 5

• 
• 
• 
• 
• 

1 / 5

Біз сөз етіп отырған экземпляр 2002 жылы жасалған (сол жылы небәрі 20 седан шыққан). Иесінің айтуынша «малахит» түсіне боялған машинаның жағдайы өте жақсы, коллекцияға қоюға әбден лайық. 2.5 литрлік бензинді мотормен (ЗМЗ-4052.10) жүретін көлік Ақтөбеде тұр, бағасы — 8.5 млн теңге.