Hyundai рестайлингтен өткен Sonata-ның алғашқы ресми фотосуретін жариялады. Седанның сырт пішіні Kona, Staria және біз Accent деп атайтын Verna стилінде жасалған.
Sonata-ның алдыңғы жағында күндізгі жүріс шамы рөлін атқаратын жіңішке жарықдиодты жолақ болады. Негізгі оптика төменде орналасқан. Артқы жағында енді C-тәрізді фирмалық шам болмайды. Оның орнын жарықдиодты панель басады. Жаңа «Соната» әдеттегі фейслифтингтен ғана өткен жоқ, өйткені дизайнерлер жарық техникасы, бампер және қанатын ғана емес, капот пен жүксалғыш қақпағын да ауыстырды.
Салонда бір блокта орналасқан медиажүйе мен аспаптар панелінің 12.3 дюймдік экрандары назар аудартады. Автоматты беріліс қорабының селекторы жоқ ортаңғы консоль де өзгеше көрінеді. Селектор рөлдің оң жағына қойылды. Рөл де жаңа дизайнда жасалыпты.
Sonata-ның техникалық жағы туралы ресми ақпарат жоқ, бірақ инсайдерлер кейбір елде седанның толық жетекті нұсқасы шығатынын айтады. Мұндай ақпаратты фототыңшылар наурыздың басында таратқан. Компания автомобильді 30 наурыз бен 9 сәуір аралығында өтетін Сеулдегі автошоуда таныстырады. Толық мәлімет сол кезде белгілі болады.
Комментариев: 0