Алты орынды BYD Sealion 08 (немесе Sealion 8) «мұхит сериясының» флагманы атанып, Қытайда жақында саудаға шығады. Бағасы әзірге белгісіз, бірақ автомобиль туралы толық ақпарат бар.
Кроссовер интеллектуал DiSus пневматикалық аспасы және артқы дөңгелектері бұрылатын толық басқарылатын шассимен жабдықталған. Өлшемдері — 5115 × 1999 × 1800 мм, дөңгелек базасы — 3030 мм. Дизайн жағынан Li Auto L8/L9, Aito M9 секілді бәсекелестерінен қалыспайды. Пішіні Ocean Series-ке сай жұмыр келген, алдыңғы және артқы оптиканың дизайны толқын тәрізді.
Sealion 08 екі түрлі күштік құрылым алады. Біріншісі — BYD Dual-Mode 5.0 платформасына негізделген қосылатын гибрид (PHEV). Ол генератор ретінде жұмыс істейтін не жоғары жылдамдықта қосылатын 1.5 литрлік бензинді турбомотор (156 а. к.) алады. Базалық 278 ат күшіне ие DM-i алдыңғы жетекті. Машина алғашқы жүздікті 8.6 секундта еңсереді. Іштен жанатын қозғалтқышсыз жүріс қоры 103 шақырымға жетеді. Толық жетекті DM-p нұсқасының қуаты 488 ат күшіне тең. Алғашқы жүздікті 4.9 секундта еңсереді, электрлі режимде 152 км жүріп өтеді.
Толық электрлі (BEV) Sealion 08 жаңа буындағы Blade 2.0 аккумуляторымен, жылдам қуаттау жүйесімен жабдықталған жеке e-Platform 3.0 Evo платформасына негізделген. Артқы жетекті түрленім 435 немесе 503 ат күшін береді. Толық жетекті модификацияның қуаты 796 ат күшіне тең. 92 немесе 115 кВт·сағ аккумулятор орнатуға болады. Жүріс қоры конфигурацияға байланысты 710-900 шақырымға жетеді.
Интерьерде екінші қатардағы кресло жеке орналасқан, жиналмалы үстел, жеке климат-бақылау блогы бар. Алдыңғы панельдің ортасына BYD DiLink мультимедиа жүйесінің 15.6 дюймдік экраны жайғасты. Модель фирмалық God’s Eye жүргізуші ассистенттерінің барлық функциясын алады. Салоны екі бөліктен тұратын панорамалы шатыр, екінші және үшінші қатардағы жолаушыларға арналған төбедегі экран және тоңазытқышпен ерекшеленеді.
Комментариев: 0