Алматы облысының Полиция департаменті жүргізушілерге маңызды ескерту жасады.
«ЕАЭО елдерінен келген автомобиль иелерінің назарына! Көлік құралын уақытша тіркеу мерзімі аяқталуға жақын.
Не істеу қажет?
Алдымен уақытша тіркеу мерзімін және құжаттарды тексеріңіз. Мерзімі аяқталуға жақын болса, мәселені кейінге қалдырмаңыз. Көлік құралын одан әрі пайдалану тәртібін алдын ала анықтап алыңыз.
Автомобильді Қазақстан Республикасы заңнамасының талаптарына сай пайдалану керегін еске саламыз. Кейін мәселе туындамас үшін құжаттарыңызды бүгін тексеріңіз», — деп жазды полиция.
Еуразиялық экономикалық одақ елдерінен Қазақстанға кірген машинаны уақытша есепке қою 2023 жылдың жазында, көлікті заңдастыру аяқталғаннан кейін басталды. Билік ел аумағына 2022 жылғы 1 қыркүйекке дейін ЕАЭО елдерінен келіп, Ресей, Беларусь, Қырғызстан немесе Арменияда шектеулерге байланысты есептен шықпаған көлік құралын 5 жылға уақытша тіркеуге рұқсат берді. Қазақстан полициясы сол кезде бұл шара мәселені шешу және қосымша уақыт беру үшін жасалған деді.
2028 жылға дейін мұндай көліктерді Қазақстанда тіркеу керек немесе шетелге жіберуге болады не уақытша есептен шығарып, бөлшектеу қажет.
Қазір елде Армениядан келген арнайы сары мемлекеттік нөмірі (А сериясы) бар автомобильдер де жүр.
Уақытша тіркеу 2020 жылы басталып, 2022 жылы аяқталды. Көлік иелері мұндай машинаны Қазақстан аумағында тозғанша жүргізе алады. Бірақ оны толық есепке қойып, утиль және бастапқы тіркеу алымын, кедендік рәсімдеу ақысын төлемейінше басқа адамға беруге (сатуға, сыйға тартуға және т.б.) болмайды. Мұндай автомобиль шетелге шықса, оны уақытша есептен шығарып, Қазақстанда сақтау үшін тапсырылған Арменияның мемлекеттік нөмірін қайта алу қажет.
Комментариев: 0