Hyundai зауытында конвейерді роботтар басқарады

Hyundai бренді Tesla мен Германиядағы әріптестері сияқты өндірісте адам тектес робот қолданбақшы. Концернге робототехника саласындағы көшбасшылардың бірі — Boston Dynamics пен оның мамандары жасаған тік жүретін Atlas роботы тиесілі.

Жыл сайын жақсарып келе жатқан Atlas ауыр жүк (50 кг) тасымалдау, бөлшектерді сұрыптау, автомобильге дөңгелек немесе аспаптар панелін орнату сияқты қарапайым әрекеттерді орындай алады. Стереокамералар, лидарлар және өзге сезгектер оған адам тәрізді қозғалуға мүмкіндік береді.

Роботтар Hyundai-нің Джорджия штатындағы кәсіпорнында сынақтан өтеді деп жазды Carscoops. Мамандар алдымен оларға қарапайым тапсырмалар береді, тиімділігі мен қоршаған ортаға қауіпсіздігіне көз жеткізген соң күрделі жұмыстарды тапсырады.

Компания андроид қызметкерлердің орнын баспайды, керісінше, көмекші болады дейді. Робот лас әрі қауіпті істі өз мойнына алады, ал адамдар неғұрлым тиімді әрі интеллектуал қызмет түріне көңіл бөледі.