BYD 1500 киловаттық қуаттағышын сынақтан өткізіп жатыр

BYD Қытайда қуаттау станцияларын салу арқылы сервистің жаңа деңгейіне шықпақшы.

Компания Шэньчжэньде 1500 киловаттық экспресс бекетті сынақтан өткізіп жатыр. Олар 1000 вольттық архитектураға негізделген машиналардың батареясын бірден қуаттай алады. 400 шақырымға жететін жүріс қорын толтыруға 5 минут кетеді.

Жаңа суперчарджер кәдімгі жанармай бекетіне ұқсайды. CarNewsChina хабарлағандай, көлікті қосқаннан кейін 10 секунд өткен соң станция автоматты режимде қуат бере бастайды және QR-код пайдаланудың қажеті жоқ.

Электр энергиясының құны — 1 кВт⋅сағ үшін 1.3 юань (~95 теңге), бұл Қазақстандағы бағаға жақын және АҚШ немесе Еуропаға қарағанда үш-төрт есе төмен.

BYD елде 4000-нан астам станция салмақшы, серіктес желілер бұл санды айтарлықтай арттыра алады. Марка 1000 вольттық платформадағы батареялы көлік алған клиентіне жылына 1000 кВт⋅сағ тегін энергия ұсынады.

Мұндай бекеттер кеңінен таралса, автоөндірушілер сыйымдылығы үлкен аккумулятордан бас тарта алады, бұл электрокардың салмағына ғана емес, бағасына да оң әсерін тигізеді.