Honda Еуропаға Super-N моделін ұсынады

Honda Ұлыбритания мен Еуроодақ аумағында Super-N электромобилін саудалайды. Шағын хетчбэк Жапонияға арналған Honda Super-One моделінің экспорттық нұсқасы саналады. Ал оны N-One кей-карының спорттық түрленімі деуге негіз бар.

Super-N сырттай көз тартар күлгін түсі және 15 дюймдік қара дөңгелек дискісімен ерекшеленеді. Ұзындығы 3.6 метр машина кей-карға қойылатын қатаң талапқа сай келмейді.

Алдыңғы осьтегі электромотор 63–94 ат күшін береді. Бірақ ең жоғары көрсеткішке буст режимінде ғана жетеді. Бұл режим беріліс ауыстыру мен дәстүрлі мотордың дыбысын шығарады.

Super-N-нің салмағы 1090 келі ғана, демек ол өз класындағы ең жеңіл машина. Ол 82 ат күшіне ие мотормен жүретін басты бәсекелесі Renault Twingo E-Tech моделінен 103 келі жеңіл. Соның нәтижесінде алғашқы жүздікті жапон моделі — 8.9 секундта, «француз» 12 секундта еңсереді. Компания өкілдері Super-N аспасы Ұлыбритания мен Еуропа жолдарына сай жасалғанын атап өтті.

Автомобильдің қала ішіндегі жүріс қоры — 320 км, бірақ автомагистральда көрсеткіш біршама төмен — 206 шақырым.

1 / 5

• 
• 
• 
• 
• 

1 / 5

Super-N салоны ерекше дизайнымен көз тартады. Мысал ретінде аралас қаптамасы бар ыңғайлы орындық, көк түсті акцент пен буст режимі қосылғанда күлгін түске ауысатын салон жарығын айтуға болады. Базалық комплектацияда мультимедиа жүйесінің сенсорлы планшеті, алдыңғы кресло мен рөлді жылыту жүйесі, сондай-ақ электрондық көмекшілер кешені бар.

Марка экзотикалық Super-N-ді Ұлыбританияда биыл шілдеде сата бастайды, бағасы 20 мың фунт стерлингтен (12.7 млн теңге) сәл төмен. Ал Еуроодақта автомобиль 19–21 мың еуро тұрады. Жергілікті маркалардың электрокарлары арасында одан арзаны Dacia Spring ғана (18.9 мың еуродан басталады), Renault Twingo E-Tech моделінің құны 19.5 мың еуро шамасында.