Еуропада жанармай қымбаттады

Франция президенті Макрон халыққа жолдауында Кремльдің агрессивті әрекетіне байланысты Еуропа басқа мұнай мен газ жеткізушілер іздейтінін айтты. Процесс ұзаққа созылатыны анық, сондықтан жұрттың біраз шыдауына тура келеді. Отын нарығы әрдайым саяси шиеленіске сезімтал келеді, бұл жолы да солай болды.

Сансыз санкцияның шырмауында қалған Ресейден энергия қорын жеткізу қиынға түсетінін білген сатушылар тауар бағасын бірден көтерді, жергілікті жанармай бекеттері де бұл істен шет қалмады.

ADAC берген мәлімет бойынша Super (АИ-95-тің баламасы) маркалы бензин Германияда 1.84-1.88 еуроға (1000 теңгеге жуық) сатылып жатыр. Бұл бір апта бұрынғы бағадан 5 % қымбат. Нидерланд мемлекетінде 95-бензиннің орташа бағасы 2.265 еуроны (1230 тг) құрады. Еуроодақ құрамына кірмейтін Ұлыбританияда болсаңыз, АИ-95-тің литрін 1.49 фунтқа (950 тг) аласыз.

Украинадағы жағдайға байланысты отын құнының күннен күнге шарықтауы жұрттың жанармайды көптеп алуына себеп болып отыр. Бекеттерде кептеліс байқалады. Ал Шығыс Еуропада орналасқан Польша мен Венгрияда 95-бензин шамамен 1.19-1.34 еуро (640–720 теңге) тұрады.

Қазақстанда АИ-95-ті 215 теңгеге алуға болады, ал сұраныс жоғары АИ-92 180 теңгеден саудаланып жатыр. Әзірше біздің елде жанармай бағасы көтеріледі деуге негіз жоқ.