ЕЭК кеңесінің 2020 жылдың аяғына дейін ЕЭО елдеріне кіргізілген электромобильдер үшін төленетін кедендік салық мөлшерлемесін жою туралы жобасы 18 ақпан күні Еуразиялық экономикалық комиссия алқасының отырысында мақұлданды. Отырысқа қатысқандар бұл шара Еуразиялық экономикалық одақта электромобильдер нарығының қалыптасып, зарядтайтын орындардың көбеюіне ықпал етеді деген шешімге келді. Бұл кедендік шекарадан жеке тұлғалар алып өтетін тауарларға да қатысты болады деген болжам бар.
— ЕЭО елдерінде электромобильдер нарығы қалыптасу үшін ең алдымен тиісті инфрақұрылым мен зарядтайтын станциялар салынуы тиіс. Екінші мәселе — өзіндік электромобильдер өндіру. Бұл іспен үш ел белсенді айналысуда, — деді ЕЭК алқасының басшысы Михаил Мясникович.
2016 жылдың қыркүйегінен 2017 жылдың тамызына дейінгі аралықта элекромобильдерге 0 % мөлшеріндегі кедендік салық қолданылған болатын. Бірақ ол кезде бұл мүмкіндік тек заңды тұлғаларға берілді. Нәтижесінде ЕЭО аумағына жеткізілген электромобильдер саны көп емес, әрі ЕЭК алқасының мүшелерінің сөзінше, Одақта қандай да бір экологиялық көлік құралдарының нарығы құрылды деп айтуға әлі ерте.
Естеріңізге сала кетейік, 2020 жылдың 1 ақпанынан бастап Алматы мен Нұр-Сұлтанда электромобильдерге арналған жүзге жуық зарядтау станциясы іске қосылды. Олардың қызметін пайдалану үшін абономент рәсімдеу қажет.
Комментариев: 0