Әлемдегі аса ірі нарықтардың бірі саналатын АҚШ-та электрлі көлікке сұраныс азайып, көптеген автоөндіруші стратегиясын асығыс өзгертті. Салдарынан сан жоба жабылып қалды. Алпауыт компаниялардың бұл әрекеті бюджетке салмақ салғаны анық. Мұны Ford, Stellantis, Honda, General Motors және Volvo-ның жылдық қорытындысынан байқадық. Plante Moran мамандары индустрия жалпы қанша қаржы жоғалтқанын есептеді.
Бұл жерде бір-екі миллиард емес, ондаған млрд көк қағаз туралы сөз болып отыр. Тіпті соңғы сома 70 миллиардқа жуықтайды. Трамп саясатының салқынын ең қатты сезген Stellantis-тің 25.8 млрд доллары желге ұшты.
Аналитиктер жаһандық деңгейдегі бірнеше автоконцерн онша зардап шекпегенін атап өтті. Бұл тізімде кезінде жаппай электрлеу процесін жақтырмай, дәстүрлі мотордан бас тартпаймыз деп мәлімдеген Toyota бар. Hyundai, Kia, Mazda, BMW және Mercedes-Benz-тің де мұрты қисаймапты.
Plante Moran дерегінше Америка тұрғындарының арасында электромоторы бар техника таңдайтындар әлі де аз емес. Өзі қуатталатын гибридтер (HEV) сегменті қарқынды дамып келеді.
Комментариев: 0