Біраз уақыт бұрын шенділер дизель қымбаттайды деп болжаған. Бүгін Алматыдағы PetrolAsia жанармай бағасын 265 теңгеге көтерді. Басқа бекеттерде оны әзірше 208-210 теңгеге алуға болады. Бірақ қолда бар ақпарат бойынша, отын құны кешке қарай 220-225 теңгеге өсуі мүмкін.
Дизельдің қымбаттауы елдің барлық өңірінде байқалды. Елордада күн суытып, кей кәсіпкер 330 теңгеден саудалай бастады. Батыс аймақта жазғы дизель сатылып жатыр, бірақ бағасы арзан емес. Мұндағы саудагерлер отын келуін күтпестен, өз цистернасын Ресейге жіберіп, 270 теңгеден дизель әкеліп жатыр екен.
Бұл әрекет негізсіз деуге келмейді. Өйткені БҚО-да 29 қыркүйекте 4.6 мың тонна, Ақтөбеде — 2.12 мың, Атырау облысында — 4.28 мың, Маңғыстауда — 8.22 мың, Алматыда — 9.92 мың тонна дизель болған. Ал жалпы елде 113.3 мың тонна, яғни 11 күнге жететін отын қоры сақталды.
Осы уақыт аралығында елге Ресейден отын жеткізуілуге тиіс, бірақ ол қымбат сатылады. Kolesa.kz дерегі бойынша қазір Омбы қаласындағы зауыттан −5 °С-та қататын 20 тонна дизель келе жатыр, ал Ордан келетін 50 мың тоннаның 10 мыңы маусымаралық, қалғаны қысқа арналған. Сонымен қатар Антипинодан 30 мың тонна қысқы дизель жеткізіледі. Олар 315-325 теңгеден саудаланады деген болжам бар.
Жағдайдың ушығуына 1 қазанда Павлдардағы зауыттың жөндеуге жабылуы да ықпал етті. Энергетика министрі Мағзұм Мырзағалиев кәсіпкерлермен жөндеу мерзімін сәл шегеруге келіскенін айтқан. Алайда бұл процесті ұзақ уақытқа шегеруге болмайды. Ай аяғына қарай мұнда күн қатты суытады, ал аязда зауыттағы құрылғыларды іске қосу мүмкін емес.
«Қазір зауыт жүктемесін азайту жоспарлы режимде іске асып жатыр. Жергілікті атқарушы органдардан бекеттер мен мұнай базаларын тексеруді сұраймын, көбірек ақша табу үшін солярканы сатпай отырғандар болуы мүмкін», — деді энергетика министрі.
Алғаш дизель тапшылығы жайлы мәселе елде маусымда, Шымкенттегі мұнай өңдейтін зауыт жөндеуге жабылғанда көтерілгенін айта кеткен жөн. Астық жинау науқаны басталғанда жағдай тіпті қиындап кетті.
Комментариев: 0