Брифингте Энергетика министрінің орынбасары Әсет Мағауов дизель тапшылығына елдегі жанармайды сыртқа алып кетіп жатқан жүк көлігін жүргізушілерді кінәлады. Алайда ол Қазақстан арқылы өтетін тасымалдаушылар саны мен олар тұтынатын дизель мөлшерін айтпады. Сондықтан шендінің дәл жүргізушілерге неліктен шүйліккені белгісіз.
Бүгін ҚР энергетика вице-министрі Әсет Мағауов, «ҚазМұнайГаз» ҰК" АҚ мұнай өңдеу және мұнай-химия департаментінің директоры Дмитрий Макеев және «Қазақстан отын қауымдастығы» төрағасы Болат Әуетаев елдегі дизель тапшылығына қатысты пікір білдірді.
Сөз сөйлегендердің бәрі елде тұтыну мөлшері артқанын, бірнеше айда жиналған қордың азайғанын, зауыттардың халықты отынмен қамтуға шамасы жетпей жатқанын және ресейлік отынды алуға мәжбүр болып отырғанымызды айтты. Шенділер қазір РФ энергетика министрлігімен келіссөз жүріп жатқанын хабарлады. Бірақ көрші елден келетін дизельдің қымбат сатылатыны анық. Болат Әуетаев алдағы уақытта жазғы отын үшін 280 теңге, ал қысқы жанармайдың бір литрі үшін 350 теңге сұралуы мүмкін деп болжады.
Комментариев: 0