Денсаулығында ақау бар жүргізуші куәлігінен айырыла ма?

Бүгін мәжіліс жол қауіпсіздігі мен кәсіпкерлік қызметті цифрландыру мәселелеріне қатысты бірқатар заңға өзгеріс енгізуге келісті.

Депутаттар денсаулығында машина жүргізуге тыйым салатын ақауы бар адамның рөлге отыруына жол бермеу үшін ІІМ-нің автоматты жүйесіне медициналық деректі қосуды ұсынды. Мұндай жағдайда дәрігер диагноз қойған сәттен бастап азаматтың көлік тізгіндеуге құқығы болмайды.

Мәжілісмендер полицияға «автомобиль жолдары мен мемлекеттік органдардың көлігіне, жедел жәрдем машинасына, күнделікті жүк және адам таситын мекемелердің техникасына орнатылатын» сертификат алған камераларды қолдана отырып, жолдағы қозғалысты бақылау құзыретін де берді.

Сонымен қатар электросамокат мінгендер бұдан былай тротуармен және жаяу жүргіншіге арналған жолақпен жүре алмайды.

Айыппұлға қатысты да жаңалық бар. «Жол жүрісі туралы» заңның 93-бабына мынадай абзац қосылады:

«Айыппұлды өндіріп алу жөніндегі міндетін орындамаған және (немесе) жол қауіпсіздігін қамтамасыз ету саласында айыппұл төлеуге тиіс деген ұйғарым алған тұлғалар қарызын өтегенше жол жүрісі саласымен байланысты мемлекеттік қызметті ала алмайды».

Қазір бұл норма 23-бапта бар, сондықтан тәртіп сақшылары берешегі бар жүргізушінің көлігін қайта тіркеуден бас тартуға құқылы. Алайда «құқылы» екені дәл солай істейтінін білдірмейді. Содан болар, ішкі істер органының кей маманы мұны өз қажетіне пайдаланып жүргені жасырын емес. Заңға түзету енген соң талап күшейетіні анық.

Заң жобасында қыста автомобильді 5 минуттан артық қыздыруға тыйым салатын норманың күшін жою туралы жазылған. Ол тек арнайы белгісі бар тұрғын үйлерде қолданылады.

Мұның бәрін төменгі палата алғаш рет талқылағанын ескерген жөн. Құжат әлі бірнеше келісім процесінен өтіп, оған мемлекет басшысы қол қоюға тиіс.