Бас қаладағы жүргізушілер бейнебақылау жүріп жатқанын білдіретін жапсырмасы бар автобустарды байқаған.
Informburo.kz хабарлағандай, Астана қаласы Көлік және жол инфрақұрылымы басқармасы 1 наурыздан бастап № 3 автопаркке тиесілі автобустарда бейнебақылау камерасы пилоттық режимде іске қосылды деп мәлімдеген. Камера автобустың алдыңғы әйнегінде тұр.
Аппарат Bus Lane арнайы жолағындағы көлік легінің қарқынын өлшеп, қаладағы қозғалыс қауіпсіздігін қамтамасыз етеді. Басқарма өкілдерінің айтуынша камера қоғамдық көлікке арналған жолаққа шығып, автобус қозғалысына кедергі келтіретін машиналарды тіркейді.
Жобаның мақсаты — арнайы жолақтың өз мақсатына сай қолданылуын қадағалау. Bus Lane жүйесі дұрыс жұмыс істесе, қоғамдық көлік жылдам әрі тұрақты жүріп, кестеге сай қызмет етеді, соның арқасында жолаушылар діттеген жеріне дер кезінде жетеді. Камера қазірше кейбір автобуста сынақтан өтіп жатыр, алда оны барлық автобусқа орнату жоспарланып отыр.
2019 жылы Алматы әкімдігі осындай жүйені іске қосуға тырысқан. Сол кезде шенділер мегаполистегі автобустар мен троллейбустарға 50 камера орнатқан, олар тіпті ереже бұзған жүргізушілерді анықтап, 2 млн теңге көлемінде айыппұл жазған. Бірақ жүйе толықтай іске қосылған жоқ.
Кейін оңтүстік астана әкімдігі автобустарға басқа камера орнатып көрді, бірақ олар да оң нәтиже бермеді.
Комментариев: 0