Полиция Алматы көшелерін жасырын тексеріп жүр

Мегаполис полициясы арнайы іс-шара барысында тексерістің жаңа форматына көшті. Полиция департаменті хабарлағандай, мамандар қарапайым көлікпен қатарласа жүріп, ережені өрескел бұзатын, ескертпестен жолақ ауыстыратын, басқа машинаның жолын кесіп, қауіпті жағдайға себеп болатындарды анықтайды.

View this post on Instagram

A post shared by Алматы қаласының ПД | ДП г.Алматы (@almaty_police_department)

Жасырын патруль ақпаратты бірден жақын маңда жүрген экипажға жібереді. Олар заңды елемейтін жүргізушілерді тоқтатып, хаттама толтырады. Осылайша өткен тәулікте 28 адамды жауапқа тартқан.

Департамент әлеуметтік желіге жариялаған видеодан ереже бұзған көліктің ізіне түскен сақшылар да дәл солай жүріп бара жатқаны байқалады. Мәселен, бір автомобильді қуып жүріп жылдамдығы 137 км/сағ-тан асып кеткен.

Тағы бір роликте тоннельдегі бүтін сызықты басып кеткені, сол арқылы өзге жүргізушілерге қатер төндіргені көрініп тұр.

Заң бойынша жыпылықтайтын шамдарын жағып, сиренасын қосқан арнайы көлік қана жол ережесін бұза алады. Ал аталған белгісі жоқ техниканың ондай маневр жасауға еш құқығы жоқ. Полиция өз қызметкерлеріне айыппұл сала ма екен, сол қызық. Заң бәріне ортақ емес пе?