Бүгін мәжілісте «Аманат» партиясының депутаты Дмитрий Колода аулада көлік қыздыру тақырыбын қозғады. Оның айтуынша биыл қаңтарда мәжілісмендер осы мәселе бойынша заңнамаға түзету енгізуді ұсынған. Тоғыз ай бойы ешнәрсе өзгермеді, ал суық күндер жақындап келеді. Депутат биыл қыста көлік қыздыру мәселесі қалай шешіледі деп ішкі істер министрінен сұрады.
ІІМ басшысы Ержан Сәденов бұл сұраққа нақты жауап бере алмады. Министр тек аулада қозғалтқыш қосып тұруға тыйым салатын норма жол ережесінде бұрыннан бар екенін, оны сақтау қажет екенін және полицейлер әкімдік қызметкерлерімен бірге түсіндіру жұмыстарын жүргізіп жатқанын айтты.
«Автомобиль балабақша мен тұрғын үйден алыс жерде тұрса, біз тек ескертеміз. Бұл мәселе бойынша мемлекеттік органдардың бірлескен шешімі қажет», — деп түйіндеді шенді. Дегенмен шешім неге әлі қабылданбағанын түсіндірмеді.
Бұған дейін полицейлер аулада көлік қыздырғаны үшін ешкімге айыппұл салмаймыз деген. Олар бір жылда екі-үш хаттама ғана толтырады.
Комментариев: 0