Коммуналдық қызмет қанша уақытта жолды қардан тазартуы керек

Алдыңғы аптада елдің көп бөлігін қалың қар басып, коммуналдық қызметтің жұмысындағы біраз кемшілік көрініп қалды. Мәселен, Алматыдағы Бұқар жырау көшесінің жиегіндегі қарды мамандар бір аптадан кейін шығарды. Бұрын әкімдіктер мерзім мүлде регламенттелмеген деп ақталатын, бірақ 2024 жылы шілдеде билік 1912-2023 ҚР СТ құжатына бірнеше норма қосты. Одан бері екі қыс өтсе де, жағдай оңала қойған жоқ. Дәлел ретінде стандарттан мысал келтірейік:

Жүргін бөлікті тазалап, тайғақ жерлерді жөнге келтіру мерзімі*

*Қала көшелері мен жолдардың категориясы және түрі төмендегі кестеде жазылған.

 

**Жолды күпсек қар мен еріген қардан тазарту мерзімі қар тоқтап, қарлы боран басылған уақыттан, тайғақ жерді жөнге келтіру ол анықталған сәттен бастап есептеледі. Қар күреу кезегі автомобиль жолдарын күту жобасына сәйкес бекітіледі.

 

***Жақша ішінде қалалар мен ауылды жерлердегі жолдарды тазалау мерзімі жазылған.

IA — III санатындағы жолдың көлік жүретін бөлігінде қалыңдығы 1(2) см-ден, IV санатты жолда 2 (4) см-ден, ал қалған көшелерде 5 см-ден аспайтын ұлпа (еріген) қар қалдыруға болады.

IA және IБ санатындағы жол жиегін енін бойлай түгел тазалау керек, ал басқа жолдарда енінің 50 %-ын қалдыруға рұқсат бар. Жұмысшылар көше жиегін қар басылған сәттен бастап 24 сағат ішінде қардан арылтып үлгеруге тиіс.

Демек, Алматыдағы Әл-Фараби, Абай, Сүйінбай, Сейфуллин, Абылай хан, Гагарин, Рысқұлов пен Райымбек, Шығыс айналма жол, Желтоқсан, Наурызбай батыр, Өтеген батыр, Саин, Момышұлы, Әуезов, Сәтбаев, Розыбакиев, Тимирязев, Жандосов сияқты көшелерді коммуналдық қызмет 3 сағат ішінде қардан тазартып, 5 сағатта тайғақ жерге арнайы қоспа себуге міндетті. Басқа көшелерге 4-6 сағат уақыт беріледі. Веложолақтар мен ауладан шығатын жол да 6 сағат ішінде ақ ұлпадан аршылуы керек. Ал іс жүзінде жағдай қалай?

Коммуналдық қызметті кім және қалай жауапқа тартады?

Стандартта жазылған мерзім мүлде сақталмайтынына көз жетті. Бірақ Әкімшілік кодекстің 631-бабында бұл үшін жаза белгіленгенін кей тұрғын білмейтіні анық. Салғырттығы үшін лауазымды тұлғалар 10 АЕК айыппұл төлейді, бір жыл ішінде қайта ереже бұзса, сома 15 АЕК-ке дейін өседі. Жол қараусыз қалып, салдарынан апат болса және ол көліктің, жүктің, жол мен ондағы құрылыстың зақымдануына әкелсе, жауапты тұлға бюджетке 20 АЕК құяды, бірақ бұдан да сабақ алмаса, келесі жолы 25 АЕК санап береді.

Істі қарап, жауапсыз мекемені жазалау қызметі полицияға жүктелген. Тәртіп сақшылары жол ережесін бұзғандарды ғана емес, жолдағы кем-кетікті де назардан тыс қалдырмай, күн аяғында басшыларына есеп беруге міндетті. Бірақ полицияның одан маңызды шаруасы көп болғандықтан, жүргізушілер 102-ге хабарласып, шағымдана алады. Тіпті патруль экипажына қар басып жатқан жол барын ескертіп, оны тіркеп алуын талап етуге болады.

Көше және жол категориялары, қолданылуы