BYD автомобиль өндірісін қысқартты

Reuters өз дереккөздеріне сілтеме жасап хабарлағандай, BYD бірнеше айдан бері өндіріс қарқынын бәсеңдетіп келеді. Сарапшылар бұған сауданың төмендегені және қоймада жиналып қалған жаңа көліктер себеп болды дейді. Қытайдағы баға соғысы да әсер етті. Бірқатар автоконцерн басшылары билікті жағдайға араласуға шақырды.

Агенттік дереккөздері соңғы айларда BYD-дің Қытайдағы төрт зауыты түнгі ауысымнан бас тартқанын хабарлады. Былтырғы төртінші тоқсанмен салыстырғанда сәуір мен мамырдағы орташа көрсеткіш 29 % төмендеген.

Компания зауытты кеңейтуге қатысты жобаларын тоқтатты. Кейбір деректе BYD үнемдеу мақсатында осылай жасағаны айтылса, басқалары мұны сұраныс азайғандықтан туындаған мәжбүрлі шара дейді.

Былтыр BYD шамамен 4.27 млн көлік сатып, биыл 5.5 миллионға жеткізуді жоспарлаған. Жергілікті сарапшылардың мәліметінше 2025 жылдың алғашқы төрт айында компания саудасы тек 15 пайыз өсті.

South China Morning Post басылымы жазғандай, CATL-дың (аккумулятор шығаратын ірі компания) өндіріс жөніндегі директоры Ни Цзюнь билік нарықтағы жағдайға араласуы керек деді. Оның айтуынша бір беделді ойыншы бағаны үнемі түсіріп, кішігірім өндірушілерді нарықтан ығыстыра алмайды. Ол кімді меңзегенін ашып айтпады, бірақ басылым сөз BYD туралы болған деп пайымдады. Концерннің вице-президенті Стелла Ли де бұны шектен шығу деп, бағаны түсіруге бәсекелестер мәжбүрлеп отырғанын жеткізді. BYD бұған қарсы шара ретінде шетел нарықтарын бағындырмақшы, бірақ Бразилия билігі брендтің нарыққа кіргеніне алаңдап, қосымша салық енгізбекші.

Geely басшысы Ли Шуфу осыған ұқсас мәлімдеме жасап, баға соғысы ең алдымен тұтынушыларға зиян келтіріп жатқанын айтты. Тым арзан электромобиль шығарған жағдайда оның сапасы ақсап қалады. Сондықтан Geely жаңа зауыт салудан және қолданыстағы кәсіпорнын кеңейтуден ресми түрде бас тартты.