Атырау — Орал трассасын жөндеу биыл басталады

«Қазавтожол» ҰК 487 км Атырау — Орал тас жолының 364 шақырымы кезең-кезеңімен орташа жөндеуден өтетінін хабарлады. Құрылысшылар бүлінген бөлікті жөндеп, трассаның тағанын нығайтады, жол жабынының төменгі және жоғарғы қабатын төсеп, жиегін тегістейді, белгі орнатып, таңба сызады.

Ұлттық компания хабарлағандай, трасса 2025–2027 жылдар аралығында орташа жөндеуден өтеді. Бірақ жобаға әлі қаражат бөлінген жоқ. Компания ақша түсуін күтіп отыр. Содан кейін ғана жобалық-сметалық құжат әзірлеу басталады. Оған дейін мамандар шұңқырларды жамаумен шектеледі.

Екі жолақты Атырау — Орал трассасы елдегі ең қауіпті жолдардың бірі саналады. 2019 жылы мамандар оны кеңейтіп, ортасын бөліп тұратын құрылғы орнатуды ұсынған. Жобаны 2025 жылы қолға алу жоспарланды. Бірақ «Қазавтожол» жолды тар күйінде қалдырып, тек асфальтын жаңартуды жоспарлап отырған сияқты.