АҚШ-та арзан пикапқа сұраныс артты

Биыл сәуірге дейін Slate Auto туралы мәлімет болмаған, десе де инвесторлар қатарында Amazon-ның негізін қалаушы Джефф Безос бар. Бастапқыда желіде Slate электрокарының тыңшылар түсірген фотосуреті тарады, екі апта өте салысымен компания пикапты ресми таныстырды, ал қазір тапсырыс саны 100 мыңнан асқаны анықталды. Мұнша адамның қызығуына 20 мың доллардан (шамамен 10 млн теңге) аспайтын бағасы себеп болған сияқты.

Slate Auto ұсынған модель өте қарапайым. Ол АҚШ-та жүрген осы сегмент өкілдерінен әлдеқайда ықшам (ұзындығы 4.4 метрге жуық). Екі есікті көліктің опциялар тізімінде құйма дискілер де, медиажүйе де, электрлі әйнек көтергш те жоқ, бірақ оны иесі қалауынша өзгерте алады.

Автомобиль артқы бөлігінде орналасқан 204 ат күшіне ие мотор көмегімен қозғалады. Батареясына байланысты (52.7 не 84.3 кВт·сағ) жүріс қоры 240 не 386 шақырымға жетеді. 650 келіден артық жүк көтере алмайтын электрокарға мамандар бірнеше қауіпсіздік жастығын, ESP және бірқатар жүргізуші асистентін орнатады.

1 / 5

• 
• 
• 
• 
• 

1 / 5

Жобаның тағы бір ерекшелігі — пикапты үш есікті жол талғамайтын көлікке айналдыру мүмкіндігі. Ол үшін мамандар шатыр, борттар және орындықтар сияқты шанаққа орнатуға болатын бірнеше жинақ әзірледі. Пакеттің бағасы белгісіз, компания электромобильдің де нақты құнын жария етпеді. Тек ел билігі 7.5 мың доллар көлемінде субсидия берсе, 20 мыңнан аспайды деген ақпарат бар.

Машинаға алдын ала тапсырыс беру тіптен оңай. Қалтаңызда небәрі 50 доллар болса жеткілікті, айнып қалған кісінің ақшасын қайтарып береді. Шағын жүк көлігі 2026 жылдың аяғында конвейерге тұрады, стартап жылына 150 мың модель шығаруға ниетті.