Қытай көлігімен АҚШ-қа туристер де кіре алмайды

Жаз басында Америка билігі Қытайдан және шетелдік қарсылас деп танылған өзге елдерден инвестиция тартқан компаниялардың мұнда көлік импорттауына, өндіруіне және сатуына тыйым салатын құжат әзірлеп жатқаны белгілі болған. Осы заң жобасы тіпті Mercedes-Benz-ке әсер ететін сияқты.

Енді шенділер бұдан қатаң ереже енгізгелі жатыр. Carscoops хабарлағандай, Қытайдың немесе өзге де дос емес мемлекеттердің бақылауында (акциясы 15 %-дан асатын) тұрған компаниялар шығарған, интернетке қосылу мүмкіндігі бар кез келген автомобильдің Мексика мен Канада аумағынан АҚШ-қа өтуіне рұқсат бермеу мәселесі талқыға түсті.

Норма қабылданса, Қытаймен байланысы бар көлікпен АҚШ шекарасынан өту мүмкін болмайды, уақытша кіретіндерге де жол жабылады. Бұл ереже туристер мен логистикалық компанияларға кері әсер ететіні анық. Өйткені Кеден және шекара қызметі уақытша кіру рұқсатын жоюға және машинаны кері қайтаруға құқылы болады.

Заң шығарушылар электроникасы, радары және камерасы бар заманауи Қытай электромобильдері мен гибридтері Америка азаматтарының геолокация дерегін жинап, маңызды инфрақұрылым нысандары мен әскери базаларды видеоға түсіріп, кейін ақпаратты Бейжіңге жібереді деп қауіптенеді.