Xpeng бренді P7 лифтбэгі қатысқан экстремал сынақты қорытындылап, мәлімет берді. 24 сағат бойы қозғалып, жүргізуші ауыстыру және сәл қуат алу үшін ғана тоқтаған машина 3961 км жүрген. Сөйтіп ол Porsche, Mercedes-Benz және Xiaomi-дің батареялы модельдері орнатқан рекордты жаңартты.
2019 жылы Porsche Taycan бір тәулікте 3425 шақырымды еңсерсе, 2024 жылы Mercedes-Benz жаңа CLA-мен 3717 деген межеге жетті, ал биыл жарысқа Xiaomi қосылды. YU7-нің нәтижесі — 3944 км.
Қытайдағы басылымдар P7-ні сынақтан өткізу үшін Xiaomi мен Xpeng басшылары өзара келісім жасады деп жазды. Xiaomi-дің бас директоры Лэй Цзюнь біраз уақыт бұрын шыдам шегін анықтайтын тест электрокардың тұтынушы үшін маңызды ерекшеліктерін көрсетеді деді. Мәселен, көліктің жоғары жылдамдықта ұзақ жүру қабілетін, қысқа уақытта барынша көп қуат алу мүмкіндігін және жүріс қорын нақты білуге болады.
Тестке P7-нің қай нұсқасы қатысқаны белгісіз. Бес есікті машина 367 не 594 ат күшін беретін моторлармен және екі түрлі аккумулятормен сатылады. Максимал жүріс қоры 820 шақырымнан аспайды. 10 минутта 525 км-ге жететін қуат алады. Бренд жаңа модельді тамыздың аяғында ресми сата бастайды.
Комментариев: 0