Алматыда автомобильдің тежеуіш жүйесіне арналған компонент шығаратын зауыт бой көтереді. Ол тежеуіш дискісі мен қалып өндіреді. Капсула салу рәсімі 23 маусымда өтті.
Almaty.tv хабарлағандай, инвесторлар кәсіпорынға 55 млрд теңге құяды. Зауытта 600 адам еңбек етіп, жыл сайын 5 млн өнім шығарады.
Alma-Ata Machinery Manufacturing Co. компаниясы Қазақстанда тежеуіш дискісі мен қалыпты толық циклде өндіретін алғашқы жоғары технологиялық кәсіпорын болады. Зауыт әлемдік автоконцерндердің сұранысына сай өнім шығарады. Демек компания өнімдерін шетелге экспорттауды көздеп отыр.
Мегаполис әкімінің орынбасары Олжас Смағұловтың айтуынша жобаның шетелдік серіктесі — Қытайдың Xianghe Zichen Auto Parts компаниясы. Оның Қытайда және Вьетнамда өндіріс орындары бар.
Әкімдік зауыт нақты қашан ашылатынын хабарлаған жоқ. Бірақ Алматы индустриялық аймағының ресми сайтындағы жүзеге асып жатқан жобалар туралы ақпаратқа сәйкес кәсіпорын конвейері 2028 жылдың I тоқсанында іске қосылады.
Комментариев: 0