Алматыда SkyTrain құрылысы қашан басталады

Қазір Алматыда SkyTrain-нің екі бағыты анықталған. Шенеуніктер жоспарды түзетіп, енді «әуе трамвайын» мына жерлермен өткізуді көздеп отыр:

1. Райымбек даңғылы бойымен «Барлық» және «Шығыс қақпа» транспорт торабы арасында. Ұзындығы — 22.5 км.
2. Саин көшесі, Әл-Фараби даңғылы және Шығыс айналма жолмен «Шығыс қақпа» транспорт торабына дейін. Ұзындығы — 23.9 км.

Informburo.kz хабарлағандай, мегаполис әкімдігі SkyTrain құрылысы 2027 жылы екі бағытта басталады деді. Бірінші желінің құрылысы 2029 жылы аяқталады. Екіншісінің мерзімін жобалық-сметалық құжат шыққанда білеміз.

Шенеуніктер SkyTrain пойыздары жерден 8-14 метр, ал кей бөлікте 12–14 метр биікте жүреді деді. Бірінші желіде — 13, екінші желіде 14 аялдама кешені мен тұрақ орындары болады. Пойыз саны мен оларды сатып алу мерзімі әзірге белгісіз. Машинистерді жұмысқа алу және қызметкерлерді оқыту жоба іске қосылуға жақын қалғанда басталады. Әкімдік SkyTrain құрылысының құнын жарияламады. Оның нақты бағасы құжат әзірлеу процесі аяқталып, мемлекеттік сараптаманың қорытындысы шыққан соң белгілі болады.