Алматыдағы SkyTrain туралы алғашқы ақпарат шықты

Болашақта Алматыда монорельсті жол іске қосылады. Жол инфрақұрылымын дамыту басқармасы Kolesa.kz редакциясына хабарлағандай, SkyTrain құрылысы көлік легін реттеп, жол инфрақұрылымының өткізу қабілетін арттыруға және экологияны жақсартуға мүмкіндік береді.

Қазір SkyTrain желісінің екі бағыты анықталған.

Бірінші желінің бағыты — «Барлық» транспорт торабынан, Райымбек даңғылы бойымен, одан әрі Саин көшесіне бұрылып, Әл-Фараби даңғылы және Шығыс айналма жол бойымен «Шығыс қақпа» транспорт торабына дейін. Желінің ұзындығы — 29 км (16 станция). Жобаны іске асыру мерзімі — 36 ай.

Екінші бағыт — Райымбек даңғылы бойымен Саин көшесінен «Шығыс қақпа» транспорт торабына дейін. Оның ұзындығы — 13 км (4 станция). Құрылыс мерзімі — 36 ай.

Демек SkyTrain желісінің жалпы ұзындығы 42 км болады. Станция саны — 20. Орташа қозғалыс жылдамдығы — 35км/сағ.

Депо Алматы облысы Қарасай ауданындағы Абай ауылында, «Барлық» транспорт торабы маңында орналасады.

Демек монорельс желісін Қаскелең мен Талғарға дейін ұзарту жоспарда жоқ. Құрылыс жұмысы нақты қашан басталатыны қазірше белгісіз. Бірақ жақында қалалық жол инфрақұрылымын дамыту басқармасы, Қытайдың CRRC компаниясы және Integra Construction KZ ЖШС LRT жобасын іске асыру жөнінде меморандумға қол қойған болатын. Сондай-ақ Қытай компанияларының консорциумы мен Integra KZ ЖШС SkyTrain желісін жобалау және салу туралы келісім жасасты.

Бұл жоба Алматы тұрғындары мен қала қонақтарының мегаполис ішінде жүріп-тұруын айтарлықтай жеңілдететін жақсы бастама болуы мүмкін. Егер транспорт тораптарында арнайы тұрақтар салынса, қалада жүретін машина саны азаюы ықтимал. Бірақ Әл-Фараби бойымен монорельс салу жоспарына қатысты сұрақ көп. Себебі бұл даңғылда арнайы автобус жолағы болады деген жоспар бар. Егер оның үстінен тағы SkyTrain желісі өтетін болса, басы артық қоғамдық көлік бағыты көбейіп, өзге автомобильдер жүретін жолақ саны азая түсетіні анық. Монорельс қаланың жоғарғы бөлігіндегі көлік легін қаншалық азайтатынын уақыт көрсетеді.