Қазір Алматы мен Астанада автомобиль сақтауға арналған үш арнайы тұрақ бар. Заң бойынша жергілікті атқарушы орган айыптұрақ салады. Ол коммуналдық меншік болып есептеледі және оған бюджеттен ақша бөлінеді. Әзірге мұндай тұрақ тегін, ешкім ақша талап ете алмайды.
Алматы мен Астана билігі айыптұрақтар толып кетті, кейбір көлік жылдап тұрады деп бірнеше рет шағымданған. Бүгін сенаторлар елорда мен республикалық маңызы бар қалаларды дамытуға қатысты заңға түзету енгізу жобасын мақұлдады.
Құжатқа сәйкес «Жол жүрісі туралы» заңда жаңа норма пайда болады. Онда жергілікті органдар (мәслихаттар) жол ережесінде жоқ мәселелер бойынша Астана, Алматы қалаларында жол қозғалысын ұйымдастыру және реттеу ережесін бекітеді, оның ішінде:
- көлік құралын тоқтату мен тұраққа қою және көшедегі ақылы тұрақ орындарын ұйымдастыру мен оның жұмысы туралы ережелер;
- Әкімшілік кодекске сай тәркіленген көлік құралын уақытша сақталатын арнайы алаңға және тұраққа жеткізу (эвакуация), жеткізу мен сақтау құнын төлеу және көлікті қайтару;
- Алматы мен Астанада қоршау құралы мен реттегіш элементтерін (шлагбаум мен басқа да қоршау) орнату бар.
Мәслихаттар коммуналдық меншікке жататын арнайы алаң мен тұраққа көлік жеткізу және онда уақытша сақтау үшін сұралатын соманы белгілейді.
Астанада Жол қозғалысын ұйымдастыру орталығы айыптұраққа автомобиль жеткізумен айналысады және бағдаршамдарды басқарып, көлік легін реттейді. Аталған орталықты құру мәселесі «Қазақстан Республикасы астанасының мәртебесі туралы» заңда көрсетіледі.
Президент құжатқа қол қойып, алғаш ресми жариялағаннан кейін норма 10 күнтізбелік күн ішінде күшіне енеді. Бірақ бұл айыптұрақтар бірден ақылы болады дегенді білдірмейді. Көлікті айыптұрақта сақтау ережелерін әзірлеп, жеткізу, сақтау қызметтерінің тарифін бекітуге уақыт қажет. Сондықтан машинасы айыптұраққа кеткен жүргізушілер күзден кейін ақы төлейді.
Комментариев: 0