«Жол жүрісі туралы» заңға, сондай-ақ цифрландыру, дербес деректерді қорғау және транспорт саласын реттеу сияқты бірқатар заң актілеріне түзету енеді.
Заң жобасын 28 мамыр, бейсенбі күні мәжіліс депутаттары екінші оқылымда мақұлдап, сенатқа жолдады. Одан кейін құжатқа мемлекет басшысы қол қояды.
Бұл заң жобасындағы бірнеше норма жүргізушілерге қатысты. Біріншіден, шенділер жедел жәрдем көлігі мен автобусқа жол ережесін бұзғандарды тіркейтін бейнебақылау жүйесін орнату жөніндегі эксперимент сәтті өтті деп шешкен сияқты. Енді бұл тәжірибе заңға қосылады.
Екіншіден, мемлекет автомектептерді қатаң бақылайды. Билік олардың қызметіне рұқсат беру тәртібін енгізбек, бұл автодромы, оқыту алаңы, арнайы көлігі және білікті нұсқаушысы жоқ ұйымдардың салада жұмыс істеуіне жол бермеу үшін керек. Тиісті құжатын алған барлық автомектеп арнайы реестрге кіреді.
Үшіншіден, заң жобасында «электромобильге арналған мемлекеттік нөмір» ұғымы пайда болады. Ол жасыл түсті болуы керек, бірақ нөмір тақтасының нақты стандартын ҚР ІІМ әзірлейді.
Құжатта елді мекенде қозғалтқышы жұмыс істеп тұрған көлікті тұраққа қоюға қатысты тыйымды жеңілдету, тұрғын үй кешендерінің тұрағында жол ережесінің қолданылуын нақтылау және басқа нормалар бар.
Жоба авторлары ұсынған барлық өзгеріс соңғы нұсқаға ене ме, жоқ па, белгісіз, оны президент қол қойған мәтін жарияланған кезде білеміз.
Комментариев: 0