Алматы әкімдігі халықтың ескі көлігін сатып алады

Былтыр желтоқсанда әкімдік Оңтүстік Астананың ауасын қорғау ережесін бекітті. Қаланы шығарынды деңгейі төмен аймақтарға бөлетін және онда қозғалысты шектейтін құжат 10 наурызда күшіне енді. Жаңа ереже бойынша 2027 жылы билік ескі көліктерді сатып ала бастайды.

Экология мәселелері жөніндегі ведомствоаралық кеңестің отырысында Алматы әкімі Дархан Сатыбалды экологиялық класы төмен көліктерді сатып алып, утилизацияға жіберетін арнайы компания құруды тапсырды.

«Бұл жұмысты Кәсіпкерлік және инвестициялар басқармасы және „Алматы“ әлеуметтік-кәсіпкерлік корпорациясымен бірлесіп жасаймыз. Автопаркті жаңартатын еншілес ұйым құрылады. Жоба аясында экологиялық таза көлік сатып алуға арналған жеңілдікті несие, лизинг және Trade-In бағдарламалары іске қосылады. Жобаға Astana Motors, Orbis және басқа да жергілікті автоөндірушілерді тартуды жоспарлап отырмыз», — деді әкімдік өкілдері.

Шенеуніктер бұл шара автопаркті жаңартуға, ескі автомобиль санын азайтуға және мегаполистің атмосферасына тарайтын зиян шығарынды деңгейін төмендетуге мүмкіндік береді деп ойлайды.

Жергілікті автобизнеспен бірлесіп көлік сатып алу идеясы түсінікті, Trade-In бағдарламасы да жұмыс істеп тұр. Билік техниканы қайда жібермекші? Халық утиль алымын төлеп келеді, бірақ ескі машинаны сатып алу және қайта өңдеу процесі әлі басталмады. Экология министрлігі кәсіпкерлерден құжат жинай алмай отырғанын хабарлады. «ӨКМ операторының» функциясы «Жасыл даму» мемлекеттік ұйымына өткеннен бері соңғы төрт жыл бойы утилизация бағдарламасы іске қосылмай тұр.